باشین ساغ اولسون آذربایجان
تورک دونیاسینین، وطنیمیزین پارلاق اولدوزو، (مراغالی اوستاد کریمی) حیات کاروانیندان آیریلیب ابدیّته قووشدو… حاییف سنه آی اوستاد! نئجه آغلاماسین ائللر، آی دَدَه!
…طنز شعر، فولکلور دونیامیزدا، آنا دیلیمیزده یازیب-یارادان، تکینه بیر آذربایجان ساییلان، مراغا شاعیرلرین دَدَهسی تانیلان، شیخالشعرای آذربایجان آدلانان شاعیر، فانی دونیادان کؤچدو، یئری بوش قالدی. او بو سون کؤچ ایله، شهرینین، یوردونون، اؤلکهنین آنا دیلینی قورویان و کشیکچی شاعیرلرینی یالقیز و دَدَهسیز قویدو. یئرین روضهی رضوان و مزارین نوریلا دولسون. شاعیر!
من سنین حقّینده نه یازیم؟ آی آنا دیلینی اورهکدن سئون ادعاسیز شاعیر!
شیرین صحبتیندن، یا دادلی و آخیجی شعرلریندن سؤز آچیم؟ هر بیتی کیتاب دولوسو معنالی و بیر منظوم تورکو نمایشنامه! دئمک ماوی دنیزیمیز قورودو!
یامیاشیل شعر باغ باغچاسی مراغادا سولدو. باغبان اؤلدو باغلار قالدی باشینا.
عــــــاشیـــــــق بـــاشینـــــــا بــاغـــلار زولفون باشینا باغلار
بولبول اؤلدو گول سولدو قــالــــدی باشینـــا باغلار
بو جیناس اوخشامانی آغ بیرچک آنالاریمیز سانکی شاعیرین حاقّیندا دئییب اوخشایبلار:
…آی آغلادیب گولدورن اوستاد حاییف سنه!
عومر بویو مجلسینده ایستهر سن آغلاتدین، ایستهر سن گولدوردون!
نهدن شعر دونیامیزی، عاشقلریوی بهصاحاب بوراخیب گئتدین آی دَدَه؟ مراغا شاعیرلرین کیمه تاپشیردین آی دَدَه؟! اؤزون دئدین: مرگ حق است و زندگی فانی… یئرین بهشت اولسون اوستاد!
نه یازیم حقّینده آی عارف، سؤز گنجینهسی؟ سنی دوستدا سئودی! دوشمنده سئودی!
…ائلده بیلیر، سن سایا گلمهین صفتلره مالک اولان، آلچاق گؤیول اوزو گولش، ادب خزینهسی، ایمانا، صداقته و شجاعته مالک اولان تانرینین گؤزهل موحّد بندهسی ایدین، چرخی دؤنموش فلکین قارشیسیندا اؤز قازاندیغی بوز باشینا قانع اولدون، اونو کهلیک پلوویلا دئییشمه دین. سارایلارا یاناشمادین. فیریلداقلار دونیاسینا یول آچمادین، تانریدان ساوای! کیمسهیه بویون اَیمدین. باش اندیرمهدین. سنین (اوغلوما نصیحت) شعرین، اؤلکهمیزین بوتون بالالارینا جاوانلارینا خطاب، دیرلی بیر وصیتدیر. «آماندی ناکیشی لردن شفاعت ائتمه قبول.» سن خلقین آیناسیدین، صابر دئمیش: «گؤردویون نیک و بدی ائیلهدین اظهار یازدین». سنین آیناندا اؤزلرینی ایری گؤرن یالتاقلاردا، سنه بوز-بوز باخا -باخا میداندان قاچمادین دؤزدون.
منجه آتان ذاکر (ره) تک ایللر بویو تورکو شعرین حرمتینی اوجا توتوب شعر صنعتینین شرفینی قورودون. تنقید دونیاسیندا، عدالتسیزلیک، ظلم؛ و زورا کارلیق، ریا کارلیق، یارامازلیق، اویون بازلیق، حیله ساتان آنبار-قالیان-محتکرلر یالتاقلیقلار باشاردیقجا علیهینه قلم چالیب اورهگه یاتان شعرلر یازیب اونلاری تاپدادین. قبرینده گوللر بیتسین آی ادعاسیز اوستاد. چوخلاری سندن فارسیجا یازماق ایستهدیلر، باش وئرمهدن جاوابدا یازدین. اونودمامالییق شعرلرین همشه نمایشنامه تک کوچه باجادا، هامیلارین آراسیندا غنی، فقیر، کاسیب، دولتلی ایچینده، کَند، کوشنده، کورسو باشیندا، اکینچیلر ایچینده، ساوادلی، ساوادسیز آراسیندا، اوجاق باشیندا، ایش باشیندا، تندیر باشیندا، تویدا، یاسدا، خلقین آغزیندان دوشمهدی هر یئری بورود و مرزلریده آشدی. یئرین جنت اولسون آی کیتابلارینین سانی سایا گلمهین شاعیر!. دونیا وار کن سؤزلرین سینهلرده قالمالیدیر. فالچی قارداش، عزراییل و مریض، قوشلار و انتخابات، تمدّون تولاسی و… آتماجاسی اولسادا، هر بیری بیر کیتاب، حکمتلی سؤز احتواسی، دئدیگیمه اؤرنک دیر.
اهــل کمــال و معــرفت غصّـــه نـــی چـــوخ یئســــین گَـــرَک
قارقا وکیل اولان قوشون اجری دی پُ… یئسین گَرَگ
منده اؤز نوبهمده بو آغیر ایتگینی، اؤلکهمیزین و آذربایجانین بوتون شاعیرلرینه، یازیجیلارینا، طنز دونیاسینین چالیشانلارینا و تامام صنعتکارلارینا، هونرمندلرینه، فضل و ادب اهلینه، اؤزهل سایین عائلهسینه و اوحدی انجمنینه، نوحه شاعیرلرینه باش ساغلیغی وئریب روحون شاد و یئرین جنّت اولسون دئییرم. اینانیرام کی: کریمیده، سعدی، حافظ، شهریار، فضولی، صابر کیمی یئری بوش قالان ائل شاعیریدیر، هیهات ایندیکی عصرده، آنالار بیرده کریمی تک آغلادان گولدورن اوستاد شاعیر دوغسون. شوبههسیز تورپاغی و مزاری گلهجکده آذربایجانلیلارین زیارتگاهی اولاجاقدیر و بونا امینم.
“تانریدانیق، تانرییا قاییداجاغیق”
درین حؤرمتله: جواد دربندی
قاضی بازنشستهی دادگستری
بیستم بهمن ماه 1401