عصرآزادی آنلاین، بو گون وطنیمیزین تورک دونیاسینین، پارلاق اولدوزو،ساتیرا، طنزشعرده، فولکلوردونیامیزدا، آنا دیلیمیزده یازیب یارادان، تکجسینه بیرآذربایجان ساییلان، مراغا شاعرلرین دده سی تانیلان، شیخ الشعرای آذربایجان آدلانان شاعرین، فانی دونیادان کؤچمه سیندن بیر ایل کئچیر.
بیلمیرم حقیّنده نه یازیم؟ اوستاد!
شیرین صحبتیندن، دادلی سوزوندن، آخیجی شعریندن، گولش اوزوندن؟
باشسیز قویدون تورکو شعرین دونیاسینی!
سن کی گئتدین، شهریمیزین باغ باغچاسی سولدو شاعر!
ماوی دنیز، اورمو گولو قورویوبان دوزلاق اولدو! قان آغلادی..
سن کی کوچدون باغلارباشینا قالدی.
ماتمین ده ائل عاشیقی قاره چکدی سازینا، مجلس لرده ترسه چالدی* اوخشادی.
عاشیق باشینا باغلار زولفون باشینا باغلار
بولبول اؤلدو گول سولدو قالدی باشینا باغلار
…آی ائلیمین آغلادیب گولدورن اوستادی، حکیم شاعر!
دای ایاغیم گلمیر ،گلم مراغایا!
سن مجلس ده ایسته ییردین آغلادیردین، ایسته ییردین گولدوردون!
نه یازیم حققینده سؤز گنجینه سی؟ هاردان تاپسین ائلیم سنی؟
سنی دوست سئوردی! دوشمان سئوردی! هاراگئتدی شعر قودرتین؟
شعرلریندن شهریاردا، سهند ده داد آلاردی. شاد اولاردی.
هارا گئتدی؟ الله دئین صفت لره مالک اولان، آلچاق گؤیول اوزوگولش، کل اورکلی، ادب سئون، ارکان بیلن شاعریمیز.
آی بوز باشینا قانع اولان. سارایلارا یاناشمایان. فیریلداقلاردونیاسینا یول آچمایان عارفیمیز؟ نئییه کوچدون دونیامیزدان. شعرلرین، اولکه میزین اولادینا، سیرقا تکین قولاغیندا آسیلی دیر..
اداره ده سنی اعدامه ائتسلر محکوم
آماندی ناکیشی لردن شفاعت ائتمه قبول.
ایللر بویو تورکو شعرین حرمتینی، شعر صنعتین شرفینی اوجا توتدون. زوراکارلیق، ریا کارلیق، یارامازلیق، اویون بازلیق، عدالتسیزلیک، ظلم و ستم، علیهینه باجاردیقجا قوشقو یازدین قلم چالدین.
مزاریندا لاله بیتسین شاعر دوستوم. هله ده وار روان-روان شعرلرین هرکوچه ده هر باجادا، غنی، فقیر، ایشچی، یوخسول وارلی خلق، ایچینده، کند کوشنده، کورسو باشی اجاق باشی تندیر باشی خرمن اوستو، اکینچیلرآراسیندا، ازبریدی.
چوخ سؤزلرین قیزیلیلایازمالیدیر. تورک ایچینده قالمالیدیر، سایا گلمز کتابلارین فولکلوردور عنعنه دیر. دونیابیلیر سن دیلیمه قوروقچویدون. یادیمدادیر بو جناس شعرده دئدین داریخما چوخ!
چیلله گلر داغ باشینا قار قالار چیلله چیخار داغ باشیندا قار قالار
دمیر قفس بولبولوندو دونیادا آزاد گزر قاناد چالار قارقالار
هاراگئتدی شعر گوجون؟ جنت اولسون یئرین شاعر!..
من ده مریدلرین تک بو ایل دونومونو، اؤلکه میزین و آذربایجانین بوتون شاعرلرینه، یازیجیلارینا، طنز دو نیاسینین چالیشانلارینا و تامام صنعتکارلارینا، هونرمند لرینه، فضل و ادب اهلینه، اؤزل سایین عائله سینه و اوحدی، انجمنینه، شعر انجمنلرینه نوحه و مرثیه شاعرلرینه مراغانین ارشاد اداره سینه و دوکتور دوستی حضرتلرینه باش ساغلیغی وئریب روحون شاد و یئرین جنت اولسون دئییرم. امینم کی کریمی ده، سعدی حافظ، شهریار، فضولی، صابر کیمی یولو داواملی یئری بوش قالان ائل شاعریدیر، شوبهه سیز تورپاغی و مزاری ائل همتی ایله گله جکده آذر بایجانلیلارین و دونیا تورک شاعرلرینین زیارتگاهی اولاجاقدیر.
درین حؤرمتله جواد دربندی پژوهشگر فولکلور و انجمن ادبی صابر طرفیندن
بهمن ماه 1402
